Aranzadi, Txantxiku eta Arizmendi ikastolek Lehen Hezkuntzako 4.mailako ikasle eta familientzat “Kondairaz kondaira bailarako txokoak ezagutzen“ irteera egin zuten martxoaren 1ean. Meatz Erreka auzotik Salturri baserrira joan ziren lehenengo, eta hortik Udala auzora, bide zaharretik. Han hamarretakoa egin ondoren, Gipuzkoari itzulia egiten dion GR 121 senda hartuta, Galarrako karobira eta koba sarrerara joan ziren, Meatz Erreka elkartera bueltatuz.

Txanelako 2. unitate didaktikoaren proiektuari bukaera emateko emanaldi bana antolatu zuten beraien geletan Lehen Hezkuntzako 4. mailako ikasleek. Emanaldiaren izena ʺAMERIKA ETA AMERINDIARRAKʺ izan zen eta Lehen Hezkuntzako ikasleei gonbitea pasatu zieten ikustera joan zitezen. Bide beretik, geletako ikasleen guraso eta familiakoak ere gonbidatu zituzten. Lan handia egin zuten gaia antolatzen, dantzak asmatzen eta gidoiak ikasten baina merezi izan zuela esan dezakegu.

Joan zen ostiralean, LH4. mailako gurasoa den Amagoia Garzia de Kortazar fisioterapeuta izan genuen gure geletan. Orain lantzen ari garen gaiaren inguruko azalpenak eskaini zizkigun: hezur, gihar, giltzadura, lotailu eta tendoien lesioak nola saihestu. Zein tratamendu egiten diren gertatzen direnean, eta kirola egin aurretik egin beharreko tiraketak egiten ere irakatsi zigun. Asko ikasi genuen eta gehiago jakiteko gogoa ere piztu zigun. Mila esker, Amagoia!

Debagoiena ezagutzen ari dira Lehen Hezkuntzako 4. mailako ikasleak eta oraingoan talde horretako guraso den Izar Salaberriren bisita izan dute. Izarrek Oñatiko Artxiboan lan egiten du eta hango funtzionamenduaren berri eman die ikasleei: zein dokumentu dauden artxiboan gordeta, zertarako, noren izenean...